വാല്മീകി ചോദിച്ച ചോദ്യത്തിനുത്തരം 1
തെറ്റിയോ മാമുനേ? സംശയിക്കുന്നു ഞാൻ.
ത്രേതായുഗത്തിലെ പാപിയായ്ത്തീർന്നൊരെൻ
ജീവിതം സത്യസുന്ദരമാകുന്ന തെങ്ങനെ?
അന്യന്റെ കണ്ണീർ നനഞ്ഞു കുതിർന്നതാ-
ണെന്നുമീ ദൈത്യന്റെ ജീവിതപ്പുസ്തകം!
ദണ്ഡകവനരമ്യ ഭൂമിയിൽ വച്ചെന്റെ
കൈപ്പിഴകൾക്കു നാന്ദി കുറിച്ചു ഞാൻ!
വീരനെന്നെന്നെ വാഴ്ത്തിയ ജ്ഞാനികൾ
തല്ലിയുടച്ചതെൻ മാനുഷികത്വമോ?
എന്നിലെ യൗവ്വനം തിരതല്ലിയ നാൾകളിൽ
ത്രൈയംബകത്തിനെ വെന്നൊരാവേളയിൽ
നേടിയതന്നു,ഞാനമൂല്യ രത്നമാ-
ണെന്നറിയാത്ത താവാമെൻ പരാജയം!
ഞാനാര്യവംശത്തിന്റെ,യാജ്ഞാനുവർത്തിയായ്‌
മഹത്തരമീ ജന്മം ബലി കഴിച്ചോൻ,
അമ്മയെ നിർദ്ദയമരിഞ്ഞ ഭൃഗുരാമന്റെ2
പിൻ ഗാമിയയവൻ ശാപഗ്രസ്തൻ!
ഒരൊളിയമ്പിനാൽ സൗഹാർദ്ദമേറ്റവൻ,3
ഒരു പെണ്മ്ണിയുടെ,യരുമയാം
പ്രണയാംഗങ്ങളെ നിർദ്ദയമരിഞ്ഞവൻ4
തപം ചെയ്തിടുമൊരു യോഗിയെ മടി-5
യൽപമേശാതെ വെട്ടിയോൻ,രഘുവംശ-
തിലകമായുള്ളവൻ വീരനോ,ഭീരുവോ?
പരിജനസ്തുതിഗീതങ്ങളല്ല,ശൂലം കണക്കെ-
ത്തുളയ്ക്കുന്ന തേങ്ങലുകളായിരുന്നെന്റെ ഹൃത്തിലെന്നും!
താരയുടെ കണ്ണീർക്കടലിൽ ഞാൻ മുങ്ങുന്നു,
ശൂർപ്പണഖയുടെ പ്രണയരോഷത്തിലെൻ
ഏകഭാര്യാവ്രതനെന്ന മുഖമ്മൂടി കരിയുന്നൂ,
മണ്ഡോദരിയുടെ വിലാപമിന്നെന്റെ
പ്രഖ്യാതമാം സൂര്യസിംഹസനം കുലുക്കുന്നൂ,
ശംഭൂകപത്നിയുടെ മിഴികളിൽ നിന്നുമൊ-
രഗ്നേയാസ്ത്രമിത,യെന്റെ ഹൃത്തിനെ ഹനിക്കുന്നൂ,
വംശമഹിമയാം ചങ്ങലക്കെട്ടിലെൻ ജീവിത-
മാശിച്ചതൊക്കെയുംവെറും ജലരേഖകൾ!
ഹാ! ഇതെന്റെ രാജ്യമോ!ഹരിതാഭയാർന്ന
വനങ്ങളെങ്ങു,മധുപഞ്ചമം പാടുന്ന
കിളികളെങ്ങു? ജീവിതക്കൊടുംവേനലിൽ
കുളിരുപകരും കാനനച്ചോലയെങ്ങു്?
വേട്ടവൻ പെണ്ണിനെ കാട്ടിലയക്കുമ്പോൾ,
കൂട്ടിനായവൾക്കാശ്രമവാടമെങ്ങ്‌?
എന്തിനു പുതുതലമുറയെപ്പറയുന്നു,
ഇവരെന്റെ പാപങ്ങൾതൻ ശിഷ്ടരത്രെ!
ഇവരെന്റെ പിന്മുറക്കാ,രിവരിൽനി-
ന്നേറെ പ്രതീക്ഷിക്കുവതെന്റെ കുറ്റം.
വന്നു ഞാൻ കാണുവാനെൻ നാടിനെ,
പ്രിയതമയേക്കാൾ പ്രിയമൊരെൻ നാടിനെ
കാണുന്നതുണ്ടു, നെറ്റിയിൽ പൊട്ടുമാ-
യെന്റെ പേർ ചൊല്ലിയട്ടഹസിക്കും ജനങ്ങളെ!
സിഹാസനത്തിനു നേരെ കൊതിയുമായ്‌
ചെങ്കോട്ടറാലികൾ നയിക്കും പ്രഭുക്കളെ.
മർത്ത്യസംസ്കാരത്തിൻ മഹത്ത്വമോതിയോർ
മാറിയില്ലൊട്ടുമേയെന്നിൽ നിന്നും!
രാമനും സീതയും ബാലിയും മരിച്ചില്ല,
വിഭീഷണൻ, രാവണരാജനും മരിച്ചില്ല;
മരിച്ചതു തമസാനദിയു,മൊരേകാന്തയാശ്രമവു-
മവിടെത്തപം ചെയ്തിടും മഹർഷിയും സ്നേഹവും!
1."കോന്വ സ്മിൻ സാമ്പ്രതം ലോകേ
ഗുണവാൻ കശ്ച:വീര്യവാൻ
ധർമ്മജ്ഞശ്ച: കൃതജ്ഞശ്ച:
സത്യവാക്യോ ദൃഢവ്രത:“
(വാല്മീകീ രാമായണത്തിൽ വാല്മീകി നാരദമഹർഷിയോട്‌ ആരാണ്‌ ഈ ലോകത്തിൽ ഏറ്റവും മഹാനായ മനുഷ്യൻ എന്ന്‌ ചോദിച്ചതിനു ഉത്തരമായാണ്‌ രാമന്റെ കാര്യം പറയുന്നത്‌.)
2.പരശുരാമൻ പിതാവായ ജമദ്ഗ്നിയുടെ ആജ്ഞയനുസരിച്ചാണ്‌ മാതാവായ രേണുകയെ വധിക്കുന്നത്‌.
3.ബാലിവധം
4.സീതാന്വേഷണ സമയത്ത്‌ പ്രണയാഭ്യർത്ഥനയുമായെത്തിയ രാവണസഹോദരി ശൂർപ്പണഖയുടെ മൂക്കും മുലകളും ലക്ഷ്മണൻ ഛേദിച്ചതിന്‌ രാമന്റെ പ്രേരണയുണ്ടായിരുന്നു.
5.ശൂദ്രനായ ശംഭൂകൻ കൊടുംതപസ്സിൽ മുഴുകിയിരിക്കെ രാമൻ വധിച്ചത്‌ വസിഷ്‌0പ്രേരണയിലാണ്‌.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ